Kassatsiya instansiyasi sudi kassatsiya shikoyatini (protestini) koʻrish natijalari boʻyicha qaror qabul qiladi, qaror ishni koʻrgan sudyalar tomonidan imzolanadi.

Kassatsiya instansiyasi sudining qarorida quyidagilar koʻrsatiladi:

1) kassatsiya instansiyasi sudining nomi, qarorni qabul qilgan sud tarkibi, sud majlisining kotibi;

2) ishning raqami, qaror qabul qilingan sana va joy;

3) kassatsiya shikoyatini (protestini) bergan shaxsning nomi (familiyasi, ismi, otasining ismi), uning protsessual holati;

4) ishda ishtirok etuvchi shaxslarning, shuningdek ular vakillarining va sud protsessi boshqa ishtirokchilarining nomlari (familiyasi, ismi, otasining ismi);

5) nizo predmeti;

6) hal qiluv qarori qabul qilingan sana, uni qabul qilgan sudyalarning familiyasi, ism-sharifining bosh harflari;

(303-modda ikkinchi qismining 6-bandi Oʻzbekiston Respublikasining 2023-yil 25-dekabrdagi OʻRQ-888-sonli Qonuni tahririda — Qonunchilik maʼlumotlari milliy bazasi, 27.12.2023-y., 03/23/888/0976-son — 2024-yil 1-yanvardan kuchga kiradi)

7) ish boʻyicha qabul qilingan hal qiluv qarori mazmunining qisqacha bayoni;

(303-modda ikkinchi qismining 7-bandi Oʻzbekiston Respublikasining 2023-yil 25-dekabrdagi OʻRQ-888-sonli Qonuni tahririda — Qonunchilik maʼlumotlari milliy bazasi, 27.12.2023-y., 03/23/888/0976-son — 2024-yil 1-yanvardan kuchga kiradi)

8) kassatsiya shikoyatida (protestida) keltirilgan hal qiluv qarorining qonuniyligini va asoslantirilganligini tekshirish toʻgʻrisida talab bildirilishiga doir asoslar;

(303-modda ikkinchi qismining 8-bandi Oʻzbekiston Respublikasining 2023-yil 25-dekabrdagi OʻRQ-888-sonli Qonuni tahririda — Qonunchilik maʼlumotlari milliy bazasi, 27.12.2023-y., 03/23/888/0976-son — 2024-yil 1-yanvardan kuchga kiradi)

9) kassatsiya shikoyati (protesti) yuzasidan yozma fikrda bayon qilingan vajlar;

10) ishda ishtirok etuvchi va sud majlisida hozir boʻlgan shaxslarning tushuntirishlari;

11) kassatsiya instansiyasi sudi tomonidan aniqlangan ish holatlari; sudning ushbu holatlar toʻgʻrisidagi xulosalari uchun asos boʻlgan dalillar; sud qaror qabul qilishda amal qilingan qonunlar va boshqa normativ-huquqiy hujjatlar; sudning u yoki bu dalillarni rad etishiga hamda ishda ishtirok etuvchi shaxslar havola qilgan qonunlar va boshqa normativ-huquqiy hujjatlarni qoʻllamaganligiga doir sabablar;

12) agar birinchi instansiya sudining hal qiluv qarori toʻliq yoki qisman bekor qilingan boʻlsa, uning xulosalariga kassatsiya instansiyasi sudi qoʻshilmaganligining sabablari;

(303-modda ikkinchi qismining 12-bandi Oʻzbekiston Respublikasining 2023-yil 25-dekabrdagi OʻRQ-888-sonli Qonuni tahririda — Qonunchilik maʼlumotlari milliy bazasi, 27.12.2023-y., 03/23/888/0976-son — 2024-yil 1-yanvardan kuchga kiradi)

13) kassatsiya shikoyatini (protestini) koʻrish natijalari toʻgʻrisidagi xulosalar.

(303-modda ikkinchi qismining 14-bandi Oʻzbekiston Respublikasining 2023-yil 25-dekabrdagi OʻRQ-888-sonli Qonuniga asosan 2024-yil 1-yanvardan chiqariladi — Qonunchilik maʼlumotlari milliy bazasi, 27.12.2023-y., 03/23/888/0976-son)

Kassatsiya instansiyasi sudining qarorida ishda ishtirok etuvchi shaxslar oʻrtasida sud xarajatlarining taqsimlanishi koʻrsatiladi.

(303-moddaning toʻrtinchi qismi Oʻzbekiston Respublikasining 2023-yil 25-dekabrdagi OʻRQ-888-sonli Qonuniga asosan 2024-yil 1-yanvardan chiqariladi — Qonunchilik maʼlumotlari milliy bazasi, 27.12.2023-y., 03/23/888/0976-son)

Kassatsiya instansiyasi sudi qarorining koʻchirma nusxasi ishda ishtirok etuvchi shaxslarga u qabul qilingan kundan eʼtiboran besh kundan kechiktirmay, ushbu Kodeksning 188-moddasida nazarda tutilgan tartibda yuboriladi.

Kassatsiya instansiyasi sudining qarori qabul qilingan kundan eʼtiboran qonuniy kuchga kiradi.

(304-modda Oʻzbekiston Respublikasining 2023-yil 25-dekabrdagi OʻRQ-888-sonli Qonuniga asosan 2024-yil 1-yanvardan oʻz kuchini yoʻqotadi — Qonunchilik maʼlumotlari milliy bazasi, 27.12.2023-y., 03/23/888/0976-son)