Oqlov hukmining qaror qismida:

1) sudlanuvchining ismi, otasining ismi va familiyasi;

2) sudlanuvchini jinoyat sodir etilishida aybsiz deb eʼtirof etish va uni oqlash toʻgʻrisidagi qaror;

3) sudlanuvchiga nisbatan qoʻllanilgan ehtiyot chorasini bekor qilish toʻgʻrisidagi qaror; basharti ehtiyot chorasi sifatida u qamoqda yoki uy qamogʻida saqlanayotgan boʻlsa, oqlangan shaxsni darhol, sud majlisi zalining oʻzida ozod qilish toʻgʻrisidagi qaror;

(470-moddaning 3-bandi Oʻzbekiston Respublikasining 2018-yil 18-apreldagi OʻRQ-476-sonli Qonuni tahririda — Qonun hujjatlari maʼlumotlari milliy bazasi, 19.04.2018-y., 03/18/476/1087-son)

4) qoʻzgʻatilgan fuqaroviy daʼvoni qanoatlantirish rad etilgan boʻlsa, daʼvoni taʼminlash uchun koʻrilgan choralarni bekor qilish toʻgʻrisidagi qaror;

(470-moddaning 5-bandi Oʻzbekiston Respublikasining 2001-yil 29-avgustdagi 254-II-son Qonuniga muvofiq oʻz koʻchini yoʻqotgan — Oliy Majlis Axborotnomasi, 2001-y., 9-10-son, 165-modda)

6) oqlangan shaxsning unga yetkazilgan mulkiy ziyonni qoplash hamda maʼnaviy va boshqa ziyon oqibatlarini ushbu Kodeksning 304 — 313-moddalarida nazarda tutilgan tartibda bartaraf qilish huquqini eʼtirof etish.

Sudlanuvchi sodir etilgan jinoyatga daxldor emasligi sababli oqlangan taqdirda, oqlov hukmining qaror qismida jinoyat sodir etgan shaxslarni aniqlash va ularni jinoiy javobgarlikka tortish uchun ish prokurorga yuborilishi koʻrsatiladi.

(470-modda Oʻzbekiston Respublikasining 2021-yil 12-yanvardagi OʻRQ-664-sonli Qonuniga asosan ikkinchi qism bilan toʻldirilgan — Qonun hujjatlari maʼlumotlari milliy bazasi, 13.01.2021-y., 03/21/664/0014-son)