Undiruvni Davlat budjeti mablagʻlariga qaratishni nazarda tutuvchi ijro hujjatlarini ijro etish iqtisodiyot va moliya organlari tomonidan tegishli budjet mablagʻlari hisobidan amalga oshiriladi.

(128-moddaning birinchi qismi Oʻzbekiston Respublikasining 2025-yil 25-dekabrdagi OʻRQ-1107-sonli Qonuni tahririda — Qonunchilik maʼlumotlari milliy bazasi, 26.12.2025-y., 03/25/1107/1216-son)

Ijro hujjatlari boʻyicha tegishli budjetdan mablagʻlar olish uchun ijro hujjatida kimning foydasiga budjet mablagʻlari oʻtkazilishi nazarda tutilgan boʻlsa, oʻsha shaxslar yoxud ularning vakillari (bundan buyon matnda undiruvchilar deb yuritiladi) tegishli iqtisodiyot va moliya organlariga ijro hujjatining asl nusxasini ilova qilgan holda ariza taqdim etadi. Arizada budjet mablagʻlari oʻtkazilishi talab qilinayotgan undiruvchining bank hisobvaragʻi koʻrsatilgan boʻlishi lozim.

(128-moddaning ikkinchi qismi Oʻzbekiston Respublikasining 2025-yil 25-dekabrdagi OʻRQ-1107-sonli Qonuni tahririda — Qonunchilik maʼlumotlari milliy bazasi, 26.12.2025-y., 03/25/1107/1216-son)

Ijro varaqasi yoki sud buyrugʻi sudyaning elektron raqamli imzosi bilan tasdiqlangan elektron hujjat tarzida axborot tizimi orqali taqdim etilishi mumkin.

(128-modda Oʻzbekiston Respublikasining 2015-yil 29-dekabrdagi OʻRQ-396-sonli Qonuniga asosan uchinchi qism bilan toʻldirilgan — OʻR QHT, 2015-y., 52-son, 645-modda)

Iqtisodiyot va moliya organi ijro hujjati kelib tushgan kundan eʼtiboran belgilangan tartibda uning ijro etilishini taʼminlaydi.

(128-moddaning toʻrtinchi qismi Oʻzbekiston Respublikasining 2025-yil 25-dekabrdagi OʻRQ-1107-sonli Qonuni tahririda — Qonunchilik maʼlumotlari milliy bazasi, 26.12.2025-y., 03/25/1107/1216-son)

Undiruvni davlat maqsadli jamgʻarmalari mablagʻlariga qaratishni nazarda tutuvchi ijro hujjatlarini ijro etish davlat maqsadli jamgʻarmalarini taqsimlovchi organlar tomonidan Oʻzbekiston Respublikasi Vazirlar Mahkamasi belgilagan tartibda amalga oshiriladi.