Давлат бюджетининг ижроси тўғрисидаги чораклик ҳисобот бюджет таснифига мувофиқ муайян давр учун Давлат бюджети даромадлари ва харажатларининг ижроси натижаларидан иборат бўлади.

Давлат бюджетининг ижроси тўғрисидаги чораклик ҳисобот қуйидагиларни ўз ичига олади:

Давлат бюджети даромадларининг ижроси тўғрисидаги ҳисоботни;

Давлат бюджети харажатларининг ижроси тўғрисидаги ҳисоботни;

бюджет ташкилотларининг бюджетдан ташқари жамғармалари ижроси тўғрисидаги ҳисоботни;

Ўзбекистон Республикасининг республика бюджетидан маблағ олувчи бюджет ташкилотларининг чет эл валютасидаги пул маблағлари ҳаракати тўғрисидаги ҳисоботни.

Ўзбекистон Республикаси Иқтисодиёт ва молия вазирлиги ушбу модданинг иккинчи қисмида кўрсатилган шакллар бўйича Давлат бюджетининг ижроси тўғрисидаги чораклик ҳисоботларни тузади.

Давлат бюджетининг ижроси тўғрисидаги чораклик ҳисоботларга қуйидаги маълумотлар илова қилинади:

Давлат бюджети даромадларининг солиқ турлари ва ҳудудлар кесимидаги ижроси;

фойдаланилган солиқ имтиёзларининг турлари ва уларнинг миқдори;

ҳудудлар кесимида солиқ қарзи ва ортиқча тўловлар;

Давлат бюджети харажатларининг соҳалар ва ҳудудлар кесимидаги ижроси;

Ўзбекистон Республикасининг республика бюджетидан биринчи даражали бюджет маблағларини тақсимловчиларига ажратиладиган маблағлар ижроси;

бюджет ташкилотларининг бюджетдан ташқари жамғармалари ижроси тўғрисидаги ҳисобот;

Ўзбекистон Республикасининг ижтимоий ва ишлаб чиқариш инфратузилмасини ривожлантириш дастурининг ижро этилиши тўғрисидаги маълумот;

юқори бюджетдан қуйи бюджетларга, давлат мақсадли жамғармаларига ажратилган трансфертлар, шу жумладан бюджет ссудалари.

Ўзбекистон Республикаси Иқтисодиёт ва молия вазирлиги Давлат бюджети ижросининг бориши тўғрисидаги чораклик ҳисоботни Ўзбекистон Республикаси Вазирлар Маҳкамасига ҳисобот давридан кейинги иккинчи ойнинг 10-санасига қадар тақдим этади.